Қазақстан президенті Нұрсұлтан Назарбаев ГФР-ға жасаған ресми сапары барысында неміс компанияларын Қазақстанмен инвестициялық ынтымақтастықты кеңейтуге шақырды, деп хабарлады мемлекет басшысының баспасөз қызметі сәрсенбіде.

«Мемлекет басшысы әлі де болса толық пайдаланылмай отырған өзара іс-қимыл әлеуеті мен бар резервтерді белсенділікпен пайдалануға шақырды. Бұл ретте республиканың Үдемелі индустриялық-инновациялық мемлекеттік даму бағдарламасы кең мүмкіндіктер ашады. Мемлекет тарапынан шетелдік инвесторларға барынша қолдау көрсетіледі. Экономиканың нақты секторындағы бірлескен бизнес-идеяларды іске асырудың көптеген тетіктері бар», - делінген кездесудің қорытындылары бойынша таратылған хабарламада.

Қазақстан Президенті Нұрсұлтан Назарбаев сондай-ақ неміс бизнесмендерін құрамына ГФР-ның екі өкілі, Қазақстан-Герман Іскерлік тобы, сондай-ақ Астана экономикалық форумы кіретін Шетелдік инвесторлар кеңесінің диалог алаңын пайдалануға шақырды.

АСТАНА, 8 ақп - Қазақстан жаңалықтары АА.

newskaz.kz