Мемлекеттік тілді дамыту қорының қолдаушылығымен шығатын интеллектуалдық «Қазақ альманағының» кезекті саны оқырманға жол тартты. Әу дегенде-ақ қазақ ойы мен рухының жоғын жоқтап, барын түгелдеуге кіріскен басылым екендігін байқатқан альманахтың бұл жолғы қор жиыны да қомақты һәм салиқалы деуге болады.

Кезекті санын белгілі пәлсапашы Әбдірашит Бәкірұлының «Ұлтшылдық» һәм «мемлекетшіл ұлтшылдық». Екеуінің қайсысы басым түспек?» атты терең талдау мақаласымен ашқан басылым келесі тарауында Еркін Ерғалиевтің «Жаңа қазақтар» және этносты жаңғырту» атты ойтолғағына орын береді. Сондай-ақ, Ғалым Боқашпен мемлекет, ел, тарих, саясат, оппозиция мәселелеріне кең ауқымда мазмұнды сұхбат, саясаттанушы Айдос Сарымның қазақ зиялы қауымының бүгінгі болмыс-бітіміне жасаған батыл зерттеу мақаласы да оқырман көңілінен шығатын дүние болатындығына бек сенеміз.

Тарата айтар болсақ, оқырман қауым альманахтың 2-ші санынан Берік Әбдіғалиев, Дос Көшім, Зира Наурызбаева, Болат Шарахымбай, Амангелді Кеңшілікұлылардың түрлі тақырыпта болса да, қазақ мұң-мұқтажын жоқтайтын мақалаларын оқи алады.