Әрбір 6,5 секунд сайын әлемде темекі түтінімен кіндігін байлаған пенденің ғұмыры кесіледі.  Мұндайда әйгілі орыс дәрігері Боткин сияқты бақилық боларының алдында көз жасын бұлдағанмен, бәрі де кеш... Өзіңді-өзің алдарқатам деп тартқан темекінің әр талы өмір діңгегіне құрт салып, я бел қуатынан ерте айырып, я жүрек талмасына апарып, әйтеуір мың сан аурумен алмай қоймайды екен. Бұны бәріміз де мойындаймыз, бірақ... «жай ғана» пенделік нәпсі бұлай пәлсапалауды сап тыйып, «ертең-ақ тырайып өлеміз, темекі шеккені де, шекпегені де» деген алибимен өзін «ақтап алады» емес пе? Алайда, қоғамның бар қатпарын меңдеткен темекіден құтылуды мемлекет қолға алмаса, тағы болмайды. Осы ретте бізде биылғы жылдың 9 қазаннан бастап «Халық денсаулығы және денсаулық сақтау жүйесі жөніндегі кодекске сәйкес» енді қоғамдық орындарда темекі тартуға тыйым салынды. Яғни, ауруханаларда, оқу орындарында, сауық-сайран кешендерінде (дискотека, түнгі клуб, кинотеатр), қоғамдық көлікте, мемлекеттік мекемелерде, мұражай, кітапханаларда, әуежай немесе теміржол вокзалдарында темекі тартуға тыйым салынады. Егер тыйымға пысқырмасаңыз, 12 960 теңгеден 77 760 теңгеге дейін мөлшерде салынатын айыппұлға қалай қарайсыз? Ең болмаса, мына фотосуреттерге зер салыңызшы? Ойланбауыңыз мүмкін емес...