Дағдарыстың «гүрілдеп» тұрған шағында әр түрлі жобаларға деген қаржы көлемін қысқартып, ысырапшылдыққа жол бермеу туралы сөз қозғалып жүр. Қаржыны халықтың қалтасынан алып, құрдымға батырар кейбір жоспарлар үшін бұл – жөнімен жасалған жай. Алайда, 2011 жылы өтуі тиіс VII қысқы Азиаданы аталған мәселе айналып өтетін секілді.
2011 жылы тойланатын қысқы Азиада ойындарына бөлінген қаржы көлемі қысқармайтын болды. Бұл туралы ҚР спорт және туризм вице-министрі Талғат Ермегияев мәлімдеді: "Республикалық бюджеттік комиссия өткізген тыңдау барыстарында қаржыландыруды қысқарту мәселесі көтерілгені рас, бірақ біз Азиада ойындарын кең ауқымды етіп өткізу құқына қол жеткізе алдық. Қалай дегенмен, бұл, ең алдымен имидждік жоба: елімізге 45 елдің спорт қозғалысының өкілдері келмек. Әсіресе, Астанада салынып жатқан велотрек құрылысына қызығушылар көп, мұнда шорт-трек және мәнерлеп сырғанау бойынша сайыстар өткізілмек. Уақытша мұз айдынын құру мәселесі де жоспарда бар...".
Республикалық бюджеттік комиссияда бірнеше рет көтерілген бұл мәселе ақыр аяғында сол қалпында қалды. Әлемдік дағдарыс кезінде қаржы үнемдеуді мектеп бітірушілердің салтанатты кешін өткізуге тыйым салудан бастаған біздің үнемшіл Үкімет бұл мәселеде ләм-мим демеді. Керісінше, асыра сілтеушілікпен болса да ел атағын шығарғанды құптайтын секілді. Сонда, біздің Үкіметке қаржы тапшылығынан қиналып, өлместің қамын кешуге көшкен қара халықтың жағдайынан атақ-даңқ артық болғаны ма?! Бұқараны «бұратылдырып» келген атақтан не үміт, не қайыр?... Белгісіз де бұлыңғыр. Тек бір анығы дарақылықпен даңққа жетуден өзге, шенеуніктер қаржының қысқармағанына қуанып, алақанына шырт түкіріп отырғандығы. Тер мен көз жасынан құралған ақшаны игілікті іске емес, дарақылық пен даңғойлыққа, жебірлік пен жемқорлыққа құртқаннан мемлекетке не пайда келмек?!... Белгісіз... Әйтеуір бір билікке ғана мәлім сағым-дүние...

«Қазақстан» апталығы. 04.06.09