Ақтөбе. 31 наурыз. ҚазТАГ – Ақтөбенің №2-ші қалалық соты облыстық мәслихаттың бұрынғы депутаты, тұтынушылар құқығын қорғау қауымдастығының төрағасы Валерий Фалалеевті 8 жылға соттады.

Ол басқаның мүлкін ірі көлемде алдау мен сеніміне кіріп жымқырған деп айыпталды. Аталған іс бойынша процесс бірнеше айға созылды.

Судья Рәзия Ахметова жариялаған сот үкімінде айтылғандай, В. Фалалеев «Проект дизайн групп» ЖШС, «Шығыс сервис Лтд» ЖШС, «Центральный рынок» ЖШС директорлар кеңесінің төрағасы болып тұрғанда, аталған кәсіпорындардың мүдделерін белінен басып, қызмет бабын пайдалана отырып, «VVV Құрылыс» ЖШС директоры Вячеслав Масалимовпен алдын ала ымыраласып, жалпы сомасы 100 млн теңге қаржыны жымқырған.

Атап айтқанда, ол бірнеше сауда үйлеріне «VVV Құрылыс» ЖШС-мен өртке қарсы автоматты қондырғылар орнату сметасында бағаны асырып көрсету арқылы түскен кірісті сыбайласымен жымқырып отырған. Осы іс бойынша В. Масалимов 7 жылға сотталып, сот олардан «Проект дизайн групп» ЖШС, «Шығыс сервис Лтд» ЖШС, «Центральный рынок» ЖШС пайдасына 96 млн теңге өндіріп алу туралы үкім шығарды.

В. Масалимов сот үкіміне келіспей бірден аштық жариялады, В. Фалалеев те келіспей, бұл тапсырыспен болған сот деп отыр. Үкім әзірге күшіне енген жоқ.