Жалғанды жалмап келе жатқан жаһандану үрдісі  көп дүниені қайтадан қарап,елеп-екшеуді қажет ететіні белгілі. Осы үрдіске үрке қараған елдер де, жаңаның бастауы деп жанына жақын тартқан тіпті осы жалмауыз алапаттың апанына түсіп барынан баз кешіп, жұтылып жатқан елдер аз емес. Бұл үрдіске анықтама беріп, айдар тағушы оқымыстылардың пікірі әркелкі. Шындығында, жаһандану - әлем назарын аударған технология мен жаңашыл көзқарастардың, өткенді саралап, мораль мен гуманизмнің тоғыса келіп классикалық үлгіге айналатын жалпы ғаламдық нормалардың этикалық, демократиялық үлгісі болуы шарт.

Алайда, жаһандану «демократия» шапанын жамылған әлемдік лидер, жеке дара билік құралы ретінде пайдаланылып отыр. Батыс пен Шығыстың бір арнаға тоғыса алмауы, сондай-ақ сансыз оқиғалар тізбегін жасаған тарих бұл процестің тамыры тереңде екенін дәлелдейді. 

Астанамыздағы кезінде елдігіміз бен ерлігіміздің символына айналған  айыр қалпақты атақты үш биге арналған ескерткішті тамашалап тұрғанымда қасыма қолтықтасқан қазақтың қыз бен жігіті келіп тоқтамасы бар ма? Обалы нешік, келісті билерге көп қарады. Танымады ма, әлде, жорта айтты ма жігітіне төтесінен «бұлар кімдер» дегені. Қыз сұрағына абдырап қалған азаматымыз «білмей тұрмын, ел қорғаған батырлар болар» деп құтылды...  Данагөй үш ақсақалдың кербез бейнесін суретке түсіріп, таңданысын «Круто!» сөзімен түйіндеген екі жас кете барды. Арттарында үлкен сауал арқалап мен қала бердім. Санасын құрт мүжіп, тарихтан мақұрым қалған жастарға таң қалдым. Арманнан бұлдыр, тәрбие атаулыдан тұлдыр қалған жастардың обалы кімде?! «Жас өспей ме, жарлы байымай ма» дейді екен дана қазақ. Алайда, тәрбиесіз өскен жас пен сәулесіз байдың ертеңгі қоғамға қажеті қанша...

Қай елдін болмасын алғашқы патшасы ақылсыз болады. Кейінгілері осыған қарап сабақ алады.

Кез-келген патшаның бойынан әл-Фараби айтқан 10 қасиеттің кемінде 7-еуі табылмаса халқын бақытсыздыққа душар етеді.

Дәл бүгінгі таңда өзін «халқым үшін қызмет етіп келемін» деп атайтындар қазақ халқының басты жауы. Жалғандық – жамандарға ғана тән дүние.